دموع Iris

دموع Iris

بسم الله الرحمن الرحيم ... 
هنتكلم النهارده عن استهلاك المياه والعلاقات العاطفية الفاشلة والمشاعر

قبل ما نبدا عاوز اعرفكو على واحدة لطيفة جدا اسمها "Iris" ليها ترجمة بالعربي بس مش عجباني فخلينا في الانجليزي احسن ...
أيريس ماشاء الله تبارك الله بتعيط كتييير كتيير لما تفرح تعيط ولما تزعل تعيط ولما حد بيقربلها بتعيط بردو ،،
أيريس بنت ناس اغنية فعندها "Lacrimal glands" خاصة تفرزلها الدموع و"Lacrimal puncta" خاصة بردو تشفط الدموع تاني عشان الاستهلاك وكده ..
أيريس زي ما قلنا بتعيط كتير فبتعيط في اليوم عشرات العشرات من الدموع مايعادل 113.6 ليتر في السنه! في الحقيقة لو راقبتوها هتلاقيها بتعيط دايما تقريبا ..
في تلت انواع من الدموع بتفرزه أيريس ..
اول نوع وهو الدموع الاساسيه او " Basal tears"
الدموع دي متخصصه في انها بتكون ثلاثة طبقات بتحمي أيريس من الجراثيم و التلوث الخارجي ايا كان وترتيبها من الاقرب للابعد :
1-طبقه المخاط ودي بتحيطها تمام بشكل كامل
2- الطبقة المائيه ودي شغلتها ترطيب أيريس بشكل دائم وبردو بتبعد البكتيريا المتطفلة وبتحمي القرنية
3-طبقة الدهون ودي مهمتها انها بتنعم ملمس أيريس و بتحمي باقي الطبقات من التبخر ..
عادة أيزيس بتقضي يومها عادي خالص ومبتلاحظش انها بتفرز الدموع الاساسيه ودا المطلوب ...
في يوم صحيت أيريس من السرير لقت امها جايبه ضيف الا وهو البصل ، أيريس بطبعها اجتماعية فسحرت ب البصل، البصل يخرج بيها عادي ويتفسحوا وزي الفل، بس في مره البصل كان بيقلع قشرته الواطي

وهنا كانت المصيبه اول ما البصل قلع قشرته افرز "SO2" اكسيد الكبريت وتفاعل كيميائي حصل ادى الى تكوين حمض الكبريت الي اساسا بيدي البصل ريحته وبعد كده يتحول لماده كريهة اسمها اكره منها: Syn-Propanethial-S-oxide والماده دي حرقت أيريس المسكينه وخلاها تفرز النوع التاني من الدموع: 
النوع التاني هو " Reflex tears" اوالدموع اللاارادية الدموع دي مختلفة عن الدموع الاساسيه لانها بتفرز لحماية أيريس بقوة من اي ميكروب او جسم خارجي وبتفرز بكميات اكبر من الدموع الاساسية و طبقتها المائيه اكبر لتحميها من اي اختراق ..
وهنا تيجي اول علاقة فاشلة في حياة أيريس مع البصل لانها كل ماالبصل يقلع قشره تبدا ايريس بالعياط فقرر البصل الخائن انه يسيبها وزي اي واحده اول ما البصل مشي وقبل ماتكتب على الفيسبوك انها سينجل بدأت أيريس بالعياط من الحزن والمشاعر على العيش والملح الي مع البصل الي ضاع ، وهنا يجي النوع التالت من الدموع: 
النوع التالت هو "Emotional tears" او الدموع العاطفيه ،وزي ماكلنا عارفين الواحده بعد لما تفركش ايه الي بيحصل من انفعلات ممكن تكون خطر ، فالعلماء بيقولوا ان الدموع العاطفيه بتفرز لموازنه واعتدال الانسان بالتوازن مع حركات تانيه زي زيادة نبض القلب .. في الحقيقه حتى الان لم يكتشف السبب الواضح لافراز الدموع العاطفية في افادة الجسم ممكن هي حركة اجتماعية لتبين عاطفة الانسان او وسيلة لاعلان حزنه او فرحه بس في دراسات من بعض العلماء بتقول ان الدموع دي بتفرز بكميات اكبر مصحوبه بهرمونات التوتر و مهدئات للالم وفي هذه الحالة الدموع بتهدأ أيريس وبتبين انها زعلانه او فرحانه...
بس عموما طول ما أيريس بتفرز الدموع التلاته دول بيضمنولها التوازن والحياة الصحية** للعلم "Iris" او " أيريس" دي طبقة رفيعه على العين متخصصة بجزء اكبر في الدموع .